Adestrando para impresionar a Gyomei Himejima

Cantas veces dicimos iso de que os lentes fixos son os mellores e que hai que achegarse cas pernas? Pois velaquí unha desas veces onde se no levara unha focal variábel tivera perdido esta instantánea que ademais durou o xusto para a captura. 

Xa hai moitos anos que a tirei, e coma foi totalmente inesperada e; por certo, nin que dicir ten que daquela non hai axudas de estabilizadores nin lerias desas e de trípode nada porque foi verme ca cámara e rapidamente deixar a actividade... e si! A pesar delo, arrisquei a unha obturación lenta confiando no meu pulso para obter a sedosidade das augas porque o efecto artístico era para min moito máis importante que a nitidez mailo detalle. A trepidación que puidera causar a incomodidade da toma pouco me importaba.

Esta segunda imaxe, cun plano xeral, nunca antes a publicara. Hoxe, pasados xa moitos anos, decidín dar pistas da localización ademais da espectacularidade da altura da caída da auga. O título da publicación fai moita referencia a isto último, e de feito, será un título que entenderán moi poucos.

Nunca souben quen era ese home, nin coido o chegue saber nunca pois en realidade non é certamente recoñecíbel; pero é unha das miñas fotos favoritas e estoulle agradecido. É un misterio que sinceramente gustaríame desvelar algún día. A pista principal é a localización. O protagonista, por suposto, terá que confirmar outros datos, pois candidatos poden ser tantos millóns coma ningún.