O naufraxio do Prima

 O Prima era unha gabarra de 105 metros de eslora que viña cargada con terra e que embarrancou en o trece de xaneiro do 2014 ao carón do Cabo Vilán, na Punta do Boi; para ser máis concretos, na praia de Reira (Camariñas).

Viña arrastrada polo buque West que alertou a Salvamento Marítimo dun fallo no cabo do remolque cando atopábase a unhas quince millas do Cabo Touriñán. Este buque tiña corenta metros de eslora e volveu dar remolque ao Prima sen éxito debido a que o cabo de remolque enredouse na hélice e fixo imposíbel o goberno da nave. O Centro de Coordinación de Salvamento Marítimo de Fisterra mobilizou entón ao buque Don Inda para asistir á gabarra que xa daquela derivaba cara a costa. Mais, ao achegarse ao lugar, decidiron con bo criterio dar preferencia á asistencia ao West que tiña problemas de goberno xa que era a nave que tiña tripulantes a bordo e primou a salvagarda de vidas humanas. A noite e as condicións meteorolóxicas da zona dificultaron a operación. Estamos en plena Costa da Morte e o nome non lle ven de balde.

O Don Inda puido poñer a salvo ao West e todos os seus tripulantes chegaron en boas condicións, pero a gabarra Prima non puido ser salvada e rematou encallando en Cabo Trece. 

Ese día podemos celebrar que as boas decisións do equipo de profesionais fixo posíbel que non se lamentasen vidas humanas, pregúntome se algún día estarán á altura ás decisións políticas nas situacións críticas.